Van groen Barney-kolwyntjies met pers versiersel tot kreatiewe verjaardagkoeke, haar liefde vir bak het begin toe haar ma haar toegelaat het om die kombuis lekker deurmekaar te maak – en sedertdien het sy nooit opgehou eksperimenteer nie. Met hope verbeelding, ’n liefde vir detail en ’n groot soettand bewys sy dat die kombuis die lekkerste speelplek kan wees.
Vir Mienke Maritz is kreatiwiteit ’n belangrike deel van wie sy is. Sy geniet dit om met kleure, geure en nuwe idees te speel en gebruik bak as ’n manier om haarself uit te druk. Vir haar gaan dit nie net oor koek en kolwyntjies nie, maar oor die rustigheid en vreugde wat sy in die proses vind.
Die naam “Mienke Meel” het sommer natuurlik ontstaan. Met haar liefde vir bak én haar naam wat perfek by “meel” pas, het die twee “M”-klanke net reg gevoel. Voor dit was die naam eintlik “Slim Happies”, maar sy het gou besef haar hart lê veel eerder by soet lekkernye as gesonde happies.
Sy geniet dit veral om verjaardagkoeke vir jonger kinders te maak, omdat dit haar die kans gee om met temas en kreatiewe ontwerpe te speel. Die grootste beloning vir haar is om kinders se opgewondenheid te sien wanneer hulle hul koek vir die eerste keer ontdek. Hoewel sy nooit verwag het haar passie sou soveel mense bereik nie, hoop sy haar storie inspireer ander jongmense om hul eie unieke talente met selfvertroue uit te leef.
Ten spyte van haar groeiende sukses bly skoolwerk haar eerste prioriteit. Sy hou daarvan om besig te wees met sport, bak en ander aktiwiteite, maar glo dit gaan nie net oor wen nie – dit gaan oor dit wat jou gelukkig maak. Wanneer dinge te besig raak, sê sy maklik nee vir bestellings en herinner sy haar maats gereeld dat almal hul eie talente het.
Sy erken dat dit nie altyd maklik is om as jong entrepreneur uit te staan nie, omdat mense dikwels nie besef hoeveel tyd en moeite agter elke koek ingaan nie. “Om een koek te bak is soos ’n hele week se netbaloefeninge saam,” verduidelik sy laggend. Tog leer sy met elke uitdaging meer en groei sy saam met haar passie.
Een van die grootste hoogtepunte van haar reis tot dusver is haar eerste tydskrif-feature in Get It. Sy vertel ook dat sy al op televisie verskyn het en saam met Volvo gewerk het – ervarings wat vir haar baie spesiaal was. Maar vir haar bly dit dikwels die klein oomblikke wat die meeste beteken, soos wanneer iemand “Mienke Meel” herken, of wanneer ’n kliënt sê dit was die lekkerste koek ooit: “Dít maak alles die moeite werd,” sê sy.
Sosiale media speel ook ’n groot rol in die groei van haar handelsmerk. Platforms soos Instagram en Facebook help ouers om haar werk raak te sien en gee mense die kans om haar kreatiewe styl eerstehands te beleef. Volgens haar is dit een van die belangrikste maniere waarop klein besighede hul naam kan bou.
Aan ander jongmense wat hul passie in iets groters wil omskep, is die raad eenvoudig: “Moet nooit bang wees om kanse te vat nie.”
Mienke Meel glo ’n mens moet doen wat jou gelukkig maak, trots wees daarop om anders te wees en jou eie kreatiwiteit vertrou, eerder as om net in ander mense se voetspore te volg.
En as sy haar hele bakreis in net drie woorde moes beskryf? “Dis net lekker!”
Text: SAZLY MOSES Photographs: GYPSEENIA LION
