Een ding is seker, Suid-Afrikaners hou van vleis en biltong bly nou maar net die heerlikste vleislekkerny onder die son. Sommige hou van wildsbiltong, ander weer van ’n lekker stuk beesbiltong met daardie lekker geelvet. Dan is daar die fynproewer wat kan biltong maak. Ons het by Frank Vorster, plaaslike vleiskenner en biltong-fundi gaan inloer vir ’n lekker resep of twee.
Biltong en Feta tert
Kors:
- 2 koppies koekmeel
- 3 t bakpoeier
- ½ t gerookte paprika
- ½ t sout
- ¼ koppie sagte margarien
- ¾ koppie melk
- 2 eiers geklits
Metode:
Sif meel, sout en paprika saam, vryf koue botter tussen jou vingers in die meelmengsel in tot dit krummels vorm. Voeg geklitste eiers by en voeg bietjie vir bietjie melk by tot die deeg ’n sagte balletjie vorm. Sit in yskas vir so 30 minute. Rol die deeg uit, sit in ’n tertbak en bak vir so 15 minute op 180 grade celsius. Laat afkoel
Vulsel
- 2½ koppies gekerfde biltong
- 1½ koppies gerasperde kaas
- 2 eiers
- 1 t mostert
- Fetakaas na smaak
- ½ handvol pietersielie
Meng kaas en biltong. Gooi in die tertbak. Meng die eiers en mostert tot romerig en gooi dit oor die vulsel. Bak vir 30-45 minute op 180 grade celsius.
Saam met die tert kan jy ’n groenslaai opdis.